ოკლაჰომაში კომერციული მძღოლებისთვის ინგლისური ენის ცოდნა და ვიზის შეზღუდვები მკაცრდება

ოკლაჰომის წარმომადგენელთა პალატამ კიდევ ერთი მნიშვნელოვანი ნაბიჯი გადადგა კომერციული სატრანსპორტო სფეროს რეგულირების მიმართულებით. 24 აპრილს, სენატის კანონპროექტი 20 (SB20) — „ოკლაჰომის უსაფრთხო გზებისა და უსაფრთხო სატრანსპორტო გადაზიდვების აქტი 2025“ — კომიტეტის დონეზე დამტკიცდა.

ენობრივი მოთხოვნები კომერციულ მძღოლებზე

ახალი კანონპროექტის თანახმად, ოკლაჰომის ტერიტორიაზე კომერციული სატრანსპორტო საშუალების მართვის მსურველებმა უნდა აჩვენონ ინგლისური ენის საკმარისი ცოდნა. კერძოდ, მძღოლებს უნდა შეეძლოთ:

• მოსახლეობასთან კომუნიკაცია;

• საგზაო ნიშნებისა და სიგნალების გაგება;

• სამართალდამცავების შეკითხვებზე პასუხი;

• ჩანაწერების და დოკუმენტების სწორად შევსება.

დამტკიცების შემთხვევაში, სამართალდამცავები უფლებამოსილნი იქნებიან ჩამოართვან და ევაკუაციაში გადასცენ სატრანსპორტო საშუალება, თუ მძღოლი ვერ დაადასტურებს აღნიშნულ უნარებს.

CDL და მოქალაქეობის მოთხოვნები

კანონპროექტი ასევე ითხოვს, რომ მძღოლებს ჰქონდეთ მოქმედი კომერციული მართვის მოწმობა (CDL), გაცემული აშშ-ის შტატში, ტერიტორიაზე ან თანამეგობრობაში, ან კანადაში ან მექსიკაში. მძღოლს თან უნდა ჰქონდეს მართვის მოწმობის ასლი და მოქალაქეობის დამადასტურებელი საბუთი.

B-1 და B-2 ვიზების მფლობელებზე შეზღუდვები

ახალი რეგულაციები მკაცრად კრძალავს B-1, B-2 და B-1/B-2 ვიზის მფლობელების მიერ კომერციული სატრანსპორტო საშუალებების მართვას ოკლაჰომაში. ასეთი დარღვევის შემთხვევაში სატვირთო საშუალება დაექვემდებარება ჩამორთმევას და მძღოლს დაეკისრება ადმინისტრაციული ჯარიმა 2,000 დოლარამდე.

გარდა ამისა, ამერიკულ სატრანსპორტო კომპანიებს ეკრძალებათ B-1 ან B-2 ვიზის მქონე პირების დასაქმება კომერციული საქმიანობისთვის ოკლაჰომის ტერიტორიაზე. დამრღვევი კომპანიები 5,000 დოლარამდე ჯარიმას მიიღებენ.

კრიტიკა და ფართო კონტექსტი

კანონპროექტმა გარკვეული კრიტიკა გამოიწვია. ოპონენტები აღნიშნავენ, რომ თავდაპირველად SB20 ეხებოდა მხოლოდ გოლფისა და კომუნალური მანქანების გზაზე გადაადგილებას, ხოლო CDL-ისა და ენის მოთხოვნები მოგვიანებით დაემატა.

არსებობს საშიშროება, რომ ახალი რეგულაციები უარყოფითად იმოქმედებს ბიზნესზე და შესაძლოა სატვირთო კომპანიებმა აირჩიონ ოკლაჰომის გვერდის ავლა.

აღსანიშნავია ისიც, რომ ოკლაჰომა ერთადერთი არ არის, სადაც მსგავსი ცვლილებები მიმდინარეობს. 2025 წლის 14 აპრილს არკანზასში ამოქმედდა Act 604, რომელიც ანალოგიურად ითხოვს მძღოლებისთვის ინგლისური ენის ცოდნას, ყალბი CDL-ის წარდგენას დანაშაულად აღიარებს და ავალდებულებს აშშ-ის სამუშაო ავტორიზაციას უცხოეთში გაცემული CDL-ის მქონე მძღოლებისთვის.

ფედერალური დონეზე კი, მიუხედავად იმისა, რომ აშშ-ის საავტომობილო უსაფრთხოების ფედერალური სააგენტო (FMCSA) ითხოვს მძღოლების ინგლისური ენის ცოდნას, 2016 წელს მოთხოვნა მძღოლების სამსახურიდან გათავისუფლების შესახებ ენის ცოდნის დარღვევის გამო გაუქმდა.