სატვირთო მანქანის მძღოლმა ExxonMobil-ის წინააღმდეგ სასამართლო დავა მოიგო და 32 მილიონი დოლარი მიიღო კომპენსაციის სახით.
გადაწყვეტილება სამშაბათს, 23 სექტემბერს გამოცხადდა მძღოლის იურიდიული ფირმის მიერ.
მედია WGNTV-ის ინფორმაციით, მძღოლი სტეფანი ჯონსონი დაშავდა ილინოისის შტატში მდებარე ExxonMobil-ის ობიექტზე, როდესაც ნავთობზე ფეხი დაუცდა და მარცხენა ხელზე დაეცა. მიღებული ტრავმების შედეგად მას განუვითარდა Complex Regional Pain Syndrome (CRPS) — ქრონიკული ტკივილის სინდრომი.
სასამართლომ ExxonMobil სრულად პასუხისმგებლად ცნო და მიუსაჯა ზარალი, რომელიც ასახავს როგორც ჯონსონის დაზიანების სიმძიმეს, ისე კომპანიის დაუდევრობას.
„მოხარული ვარ, რომ სამართალი აღსრულდა. ეს განაჩენი მხოლოდ ჩემთვის არაა — ეს ყველა მუშაკისთვისაა, ვინც კორპორატიული დაუდევრობით დაშავდა,“ — განაცხადა ჯონსონმა.
ExxonMobil-ის წარმომადგენელმა აღნიშნა, რომ კომპანია განაჩენს გაასაჩივრებს:
„ეს არაგონივრული გადაწყვეტილებაა, რომელიც არ შეესაბამება სასამართლოში წარმოდგენილ მტკიცებულებებს. ვაპირებთ ყველა სამართლებრივი გზის გამოყენებას სააპელაციო პროცესში,“ — ნათქვამია კომპანიის განცხადებაში.
